Wednesday, May 28, 2008 Barrita: LPG By Eddie O. Barrita Tikdul-tikdol
GUSTO sa kapulisan nga ipahamtang ang maximum security alang sa liquefied petroleum gas (LPG) nga gigamit sa mga sakyanan sama sa mga taxi dinhi sa dakbayan sa Sugbo.
Matod pa ni Police Regional Office (PRO) 7 Director Ronald Roderos, ang LPG usa ka “mixture of highly combustible, inflammable and explosive gases” nga mahimong gamiton sa mga terorista.
Dugay na nga gigamit sa mga terorista ang LPG–-gigamit sa pagluto sa ilang kan-on ug sud-an.
***
Bitaw, tukma ang gibuhat ni General Roderos sa pagpahimatngon sa ka peligro niining LPG sa mga sakyanan.
Tiaw mog magdungan og ulbo ang 5,000 ka mga taxi nga nigamit og LPG?
Matod ni General Roderos, lakip usab nga angay pahamtangan sa maximum security mao ang mga LPG refilling stations.
Apan gipaluyohan ni Cebu City Mayor Tomas Osmeña ang mga LPG providers kay gani bisan karon, lisod kaayo ang pagkuhag permit aron sila maka-operate.
***
Gibalik sa Philippine National Police (PNP) ang ilang programa nga “Serbisyo May Ngiti” aron mopahiyom samtang mag-atiman sa publiko.
Matod ni PNP Directorate for Police Community Relations Leopoldo Bataoil, gipatuman kini tungod kay tigas kaayo ang mga pulis sa atubangan sa publiko.
Pero segurado kong maglisod ang mga pulis og pahiyom samtang nakigpinusilay sa mga tulisan.
***
Matod pa ni Cebu City Councilor Jack Jakosalem, ang mga neophyte councilors sa dakbayan nagtrabaho sa ilang mga committees bisan pag nagpakahilom lang sila.
Tingalig busy kaayo sila sa ilang trabaho sa committee on silence.
Maayo si Councilor Jack kansang hulagway didto sa construction site sa Ban-Tal flyover nagbansiwag.
Konsehal pa ni siya, pero mora sab siyag kongresista tan-awon.
***
Gikataho nga si Anakpawis party-list Rep. Crispin Beltran, nga namatay human mahug samtang nagtapak sa atop sa iyang balay, mao ang labing kabos sa 238 ka mga kongresista.
Duna pa diay kabus nga sakop ang Kongreso.
Di sab ni nato matawag nga unexplained poverty kay pangulo man siya sa mga gitawag nga anak sa singot.
