Wednesday, July 16, 2008 Barrita: News By Eddie O. Barrita Tikdul-tikdol
USA ka taho sa Agence France Presse niingon nga gideklarar nga unconstitutional sa Labawng Hukma-nan sa nasod sa Romania ang usa ka bag-ong balaod nga nagmando nga kinahanglang patas ang good news ug bad news nga isibya sa ilang mga radyo ug telebisyon.
Good news alang sa mga broadcasters sa Romania, bad news alang sa ilang mga senador nga nagpanday sa maong balaod.
***
Duha ka mga senador sa Romania nga nagpasiugda sa maong balaod nireklamo sa daotang epekto sa mga negatibong balita ngadto sa panglawas ug kinabuhi sa katawhan.
Mao nga kinahanglang patas ang bad news ug good news.
Mao nay nakapait kon ang mga magbabalaod nay maoy magbuot kon unsay ibalita.
***
Matod pa ni Rasvan Popescu, ang chairman sa National Audiovisual Council sa Romania, nga mao untay gitahasan sa pag-ila kon unsay bad news ug good news, “news is news.”
“It is neither positive or negative. It simply reflects reality. I don’t believe that the introduction of such a quantitative criteria can work. Events cannot be programmed, nor can minds.”
***
Maayo gani kay wa pay magbabalaod sa Pilipinas nga nakahunahuna og sama niining maong balaod sa Romania.
Mahisama unta ta niadtong estorya sa usa ka doktor nga niingon ngadto sa usa ka bana: “Good news ug bad news. Ang good news, mabdos imong asawa. Ang bad news, di ikaw maoy amahan.”
O kaha kadtong niingon: “Bad news ug good news. Ang bad news, gitakdan og gonorrhea imong asawa. Ang good news, di ikaw maoy nakatakod.”
***
Kon duna pa kitay balaod nga sama niini, katunga ra untay nalunod sa Princess of the Stars ug katunga ray mangamatay aron patas ang bad news ug good news.
Bad news: Magpapatigayon Efrain Pelaez nipasangil sa giingong pangurakot sa administrasyon ni Lapu-Lapu City Mayor Arturo Radaza.
Good news: Mayor Radaza gidayeg tungod sa talagsaong nakab-ot sa iyang dakbayan nga nahilakip sa nanag-unang mga dakbayan sa Pilipinas alang sa mga mag-papatigayon sa pagtukod og negosyo ug nag-una sa infrastructure sumala sa survey sa duha ka tinahod nga mga institusyon.
