NAAKSIDENTE ang aktor na si Dingdong Dantes habang kinukunan ang isang emosyonal na eksena para sa kanyang teleserye na "Dyesebel".
Nalihis ang buto sa kanang kamay ni Dingdong matapos niyang mamiskalkyula ang pagsuntok sa isang puno. Ipinakita sa isang video sa "Showbiz Central" ang eksena kung saan paulit-ulit na sinuntok ni Dingdong ang puno na naging dahilan ng pagdurugo ng kanyang kamay at pagkalihis ng kanyang buto.
"Nagkaroon lang ng konting mali so un mayroon ng koreksyon na ginagawa. May maliit lang na buto na medyo nalihis so kailangang lang nating i-heal so medyo matatagalan ng konti. Pero like what I said tuloy pa rin naman ang mga ginagawa ko medyo kailangan lang magbawas ng konti sa mga physical activities," pahayag ng aktor.
Ang ebidensiya naman ng nasabing aksidente ay nakita ng ilan ng kumanta ang binata sa SOP noong Linggo. "Ganoon talaga kapag committed ka sa ginagawa mo. Kahit ano pa walang makakaharang sa iyo," mariing pahayag ng aktor.
Nang mabalitaan ng kanyang kapareha sa "Dyesebel" na si Marian Rivera, ang aksidente na sinapit ni Dingdong, agad nitong tinawagan ang aktor para kamustahin.
"Wala kasi ako doon sa taping nung araw na nabalian siya. Noong dumating ako, tinawagan ko siya nasa ospital daw siya. Hindi din biro ung nangyari sa kanya, sana maayos na," pahayag ng aktres.
Dagdag pa niya ayaw ng pag-usapan ni Dindong ang nangyari sa kanya dahil hindi na rin naman nito mababalik ang kanyang pagkakamali.
"Hindi natin maiiwasan ang mga bagay na ito ang importante nangyari ito at kung mangyayari man ulit alam na namin ang gagawin," pagtatapos ni Dingdong. (JRDB/Sunnex)
