Wednesday, October 15, 2008 Angelika, tuloy ang trabaho
KAHIT na inamin ng aktres na si Angelika dela Cruz ang kanyang pagbubuntis, hindi pa rin ito hihinto sa pagtatrabaho at sinigurong hangga't kaya niya ay tatanggap pa rin siya ng mga shows.
Kabilang siya ngayon sa remake ng Argentine series na "La Lola" na nagsimula ng ipalabas noong Lunes.
Ayon sa aktres, hangga't kaya pang itago at gawan ng paraan para hindi mahalata ang kanyang tiyan ay patuloy pa rin niyang gagampanan ang kanyang role sa "La Lola" kung saan gaganap siya bilang isang modelo.
Tatlong buwan pa lang ang ipinagbubuntis ni Angelika kaya hindi pa masyadong mapapansin ang kanyang tiyan.
Kahit mga apat o limang buwan ay maari pa rin niyang madaya ang kanyang pigura sa mga damit na isusuot niya kaya naman tuloy parin ang maybahay ni Orion Casareo sa pag-tatrabaho.
Noong Linggo lang ay inamin ni Angelika na nagpakasal na siya sa non-showbiz na nobyo nitong si Orion na nagpahayag din ng kasiyahan sa pagbubuntis ng aktres.
Ayon kay Angelika, kahit na magkaroon na siya ng pamilya ay tuloy pa rin siya sa pag-aartista. Hindi daw niya iiwan ang karera na ilan taon niyang minahal at inalagaan.
"Mahal ko ang trabaho ko and I will definitely not quit showbiz," pahayag ng aktres.
Sa isang taon nakaplanong magpakasal sina Angelika at Orion sa simbahan. Inaasahang magiging isang simpleng kasalan lang ang magaganap kasama ang kani-kanilang pamilya at malalapit na kaibigan. (JRDB/Sunnex)
