Tuesday, October 21, 2008 Ama ni Karylle panakip butas lang?
MATAPOS ang kaliwa’t-kanang paninisi sa aktres na si Marian Rivera sa napapabalitang hiwalayan diumano ng magkasintahang Karylle at Dingdong Dantes, ang ama naman ni Karylle ngayon ang isa pang itinuturong dahilan.
Lumabas nga sa ilang pahayagan na tutol daw ang ama ni Karylle sa pag-iibigan ng dalawa kaya naman labis daw itong dinamdam ni Dingdong at nauwi nga sa hiwalayan ang kanilang relasyon.
Para sa ilang masugid na fans ni Karylle at Dingdong, hindi sila naniniwala sa balitang ang ama ng singer-actress ang tunay na dahilan at iginiit na lumalabas lamang daw ang mga balitang ito para mapagtakpan ang diumano’y lumalalim na relasyon nina Marian at Dingdong.
Ang ama ni Karylle daw ay ginagawang panakip butas lang para hindi masisi si Marian sa umuugong na hiwalayan ng dalawa.
Anila, kung tutol ang ama ni Karylle kay Dingdong ay sana noon pa at hindi sana nagtagal ng halos apat na taon ang pag-iibigan ng dalawa.
Hanggang ngayon ay wala pa ring pahayag si Marian tungkol sa balitang ito. Pinili niya na manahimik muna upang hindi pa diumano lumala ang sitwasyon.
Si Dingdong naman ay tikom pa rin ang bibig at kung magbibigay man ng pahayag ay hindi nito diretsang inaamin na hiwalay na sila ni Karylle.
Bago tumulak si Dingdong sa Amerika ay pinabulaanan na ni Karylle ang usap-usapang hiwalay na siya sa nobyo.
Sinabi ng aktres na naiinis na nga siya sa mga tsismis at hindi nalang daw niya ito pinapatulan dahil alam niya ang totoong namamagitan sa kanila ni Dingdong.
Ang ex-girlfriend naman ni Dingdong na si Antoinette Taus ay una na ring pinuri ang Dyesebel star at nag-wikang bagay si Dingdong at Marian. (JRDB/Sunnex)
