Monday, November 03, 2008 Patani ayaw pa-apekto sa intriga
HINDI pa man tuluyang bumubukadkad ang career ng "Yaya ng Bayan" na si Patani Daño ay sunud-sunod na ang intriga tungkol sa kanya.
May mga nagsasabing lumalaki na nga ang ulo ng baguhang komedyana ngunit mariing pinabulaanan naman niya ito sa presscon ng "Survivor Philippines" noong Biyernes.
"Hindi po totoo 'yan. Wala pa rin pong nagbabago sa akin at walang magbabago. Kung meron man pong mga nagkakalat at naninira bahala na sila basta ginagawa ko lang ang trabaho ko at malinis ang konsensya ko," depensa ni Patani.
Kwento ni Patani, sinabihan daw siya ng ilang mga kaibigan niya na parang siya ang tinutukoy sa isang blind item sa telebisyon. Gayunpaman, iginiit niya na hindi siya 'syun dahil hindi naman niya natatandaan na nasangkot siya sa nasabing insedente.
Ayon sa blind item naghahanap daw umano ng sariling dressing room ang baguhang artista na 'kala mo kung sinong umasta. Paliwanag ni Patani, "Hindi ko 'yun ginawa, naghanap ng sariling dressing room kung alam lang nila ang pinagdaanan ko. Huwag sanasilang magkalat."
Sa halip na magalit ay tinawanan nalang ni Patani ang paninira sa kanya at nagsabing mas masaya pa nga siya nagyon dahil napag-uusapan siya. Aniya, mas lalo pa siyang nabibigyan ng mas mahabang "exfosure" ng mga naninira sa kanya.
Ngunit kung ang pagbabasehan ay ang kilos ng dalaga ay wala naman talagang nagbago dito. Ganoon pa rin ang pakikitungo niya sa tao at hindi kakikitaan ng anumang pagmamalaki.
Sa kabila ng paninira, sunod-sunod pa rin ang trabaho na dumarating kay Patani kabilang na ang katatapos lang na guesting niya sa comedy show na "Nuts Entertainment". May nakakatuwa at mahalagang role din siya sa comedy series tuwing Linggo na "Ful Haus" kung saan gaganap siya bilang Ingliserang yaya.
"Masaya po ako na hindi pa napapalabas yung unang episode sa 'Ful Haus' may kasunod na. Napaka-challenge po ng English," sambit ni Patani.
Tuloy-tuloy pa din na mapapanood siya sa "Unang Hirit" araw-araw gayundin ang isa pang Survivor castaway na si Nikki Dacullo.
Ipinasok na din si Patani sa pelikulang "Iskul Bukol" na pinagbibidahan nina Tito, Vic, at Joey.
Sa dami ng ginagawa ni Patani nakapag-adjust na daw siya sa bago niyang buhay at hindi niya iniinda ang pagod dahil ito naman talaga ang pangarap niyang gawin.
"Ang sarap ng pakiramdam na busy ka kasi alam mo na panibagong 'exfosure' and kahit papano kikita ka," bulalas ng kwelang aktres. (JRDB/Sunnex)
