Friday, November 14, 2008 'Da Spooftacular Showdown' humakot ng papuri
MULING pinatunayan ng tatlong pinagpipitagang komedyante ng bansa na sina Jon Santos, John Lapus, at Candy Pangilinan na karapat-dapat silang mapabilang sa tinatawag na "comedy royalties" matapos ang matagumpay na unang dalawang gabi ng "Da Spooftacular Showdown."
Napuno ng halakhak at palakpak ang buong Music Museum nang sinimulan ng magbatuhan ng kani-kaniyang skit ang tatlong komedyante at isabuhay ang kani-kanilang ginagayang karakter gaya nila Kris Anino, Charos Pempengco, Okra, Celine Doon, at Vicki Bolo.
Lumipas man ang panahon ay tila hindi pa rin kumukupas ang husay ng tatlong ito sa pagbibigay aliw sa mga tao.
Sabi nga nila ang sekreto marahil ay ang magandang pagkakaibigan at closeness nila sa isa't isa kaya naman click na click ang tandem nila mapa-pelikula man o sa entablado.
Kasama ang dalawang baguhang komedyante na sina Vice Ganda at Kim Idol, inulan ng magagandang papuri at malalakas na palakpak mula sa mga manood at maging sa mga nagsidalong entertainment press ang "Da Spooftacular Showdown" at inaasahan pang magpapatuloy ito sa mga susunod nilang pagtatanghal.
Sa loob ng halos tatlong oras ay matagumpay nilang napasaya at napagulong sa kakatawa ang mga manood na kahit sa paglabas ay pinag-uusapan pa rin ang ilan sa mga nakaka-aliw na eksena nila.
Tiyak na kaabang-abang naman ang ikatlo at ikaapat na gabi ng "Da Spooftacular Showdown" ngayong Biyernes (November 14) at Sabado (November 15) dahil isa pang magaling na komedyante ang makikigulo sa tatlo. Si Pokwang na naging kontrobersiyal mula sa kanyang nakaraang show na "Poohkwang."
Siguradong panibagong batch na naman ng manonood ang sasakit ang tiyan sa mga comical skit ng tatlo at para sa mga taong gustong makalimot ng lungkot at mag-aliw, ito na ang hinihintay ninyong gabi.
Mula sa direksyon ni Phillip Lazaro at sa script nina Kim Idol, Ador Cuntapay at Joel Mercado, ang "Da Spooftacular Showdown" ay hatid sa inyo ng “Asap Live!” na naghatid din sa inyo ng "Poohkwang" at "Rock Da Vote."
Matutunghayan ang comedy show na ito sa lahat ng Biyernes at Sabado ng buong buwan ng Nobyembre hanggang unang Linggo ng Disyembre.
Para sa ticket inquiries at reservations sa "Da Spooftacular Showdown," maaaring tumawag sa Ticketworld (891-9999) o sa Music Museum (721-6726). (JRDB/Sunnex)
