Wednesday, July 25, 2007
General Santos: 30 nahilo sa pagkaon (3:45 p.m.)
By Mel Coronel
GENERAL SANTOS -- Mga tinun-an gisakitan og tiyan human nangaon sa humba,dinuguan, lechon ug apritada.
Mikabat sa 30 ka mga tinun-an sa Ramon Magsaysay Memorial Colleges ning dakbayan sa General Santos (RMMC) gipangdala ngadto sa St. Elizabeth Hospital human sila gisakitan og tiyan ug ulo human sa usa ka adlaw nga pagpangaligo og dagat atol sa ilang Foundation Anniversary sa tanang mga working student sa RMMC.
Sa pakighinabi sa RMN Radyo Gensan ug sa Superbalita ngadto sa usa sa mga nahilo nga si Nerecil, (apelyido gitago kay menor de edad), 16 anyos ug molupyo sa Balagtas street sa Barangay Dadingas North ning siyudad, siya nagsulti nga nangaon sila sa inandam daan nga mga pagkaon.
"Dominggo sa buntag nangaligo mi mga kapin 70 mi tanan apil na ang 6 ka mga staff sa RMMC, kay anniversary man sa among club sa tanang mga working student sa RMMC, daghan mi og giandam nga pagkaon naay humba, dinuguan, lechon, apritada ug uban pa", matud pa ni Nerecil.
Apan sumala ni Nerecil sa pagkagabii gibati na lang niya nga taas na ang iyang hilanat, nanakit ang iyang ulo ug kalawasan. Lunes sa kaadlawon gibati sa biktima ang pagsuka ug kalibang, apan miadto gihapon siya sa tunghaan human nakaainom og tambal.
Apan pag-abot sa tunghaan nagdungan na ang mga working student pagsud sa clinic sa tunghaan aron mangayo og tambal tungod sa gipangbati nga sakit sa tiyan ug ulo.
"Dili na gyud namo maantos hinungdan nga mipauli na lang ko sa balay, natingala na lang ko kay giapas na man ko sa among teacher sa among balay aron dad-on sa hospital ug karon nia mi tanan sa St. Elizabeth", dugang pa sa biktima. (Super Balita Gensan) |
