Sunday, August 12, 2007
Davao: Suspek sa pagbugha sa 20 anyos nga gipasangil sa DDS, nadakpan (3:40 p.m.)
DUNA na'y suspek nga gipriso ug padayong giimbestigahan sa kamatayon sa usa ka lalaki, kinsa sayo niini gidudahang gipatay sa nabantog nga death squad sa Roxas Extension, dakbayan sa Davao niadtong Biyernes sa udto.
Sa dugang pakisusi sa homicide section sa Sta. Ana police station, ilang gisignit ang usa ka Rolando B. Epifanio, 20, construction worker, taga-Bago Aplaya, gikatahapang suspek sa pagluba patay kang Danver Olaer, molupyo sa Saavedra village, Bago Aplaya, ning siyudad.
Si Jay-ar Olaer, ig-agaw sa gipatay, nagtug-an nga sa wa pa gipatay ang biktima, nakaaway niini si Epifanio, kinsa naghulga kang Danver nga patyon pinaagi sa mga text messages.
Hinuon, gilimod ni Epifanio nga nalambigit siya sa kamatayon ni Olaer.
Kahinumdoman nga si Olaer gipatay sa mga nakamotorsiklong killer sa Roxas Extension, atubangan sa Tai Chung General Merchandise Biyernes sa udtong tutok. (RCO of Superbalita Davao) |
