Thursday, September 27, 2007
General Santos: Tawo nga dugta na, nakit-an (2:20 p.m.)
By Mel Coronel
GENERAL SANTOS -- Dugta na ang lawas sa usa ka lalaki nga nakit-an nga naglutaw-lutaw sa kadagatan.
Ang biktima giila sa iyang igsuon nga usa ka Bernardo Belmonte, 37 anyos, ulitawo ug molupyo sa Lower Makar, Barangay Labangal ning dakbayan sa General Santos.
Matud ni Zenaida nga Sabado, Septyembre 22 sa alas 12 sa tungang gabii uwahing nakit-an niya ang iyang igsuon nga hubog ug nakig-istorya. Sumala kaniya nga bisag giunsa niya og tambag, wala na magpabadlong ang igsuon kay molakaw gyud.Nakurat na lamang si Zenaida niadtong Dominggo sa buntag kay wala na makauli sa ilang bay si Bernardo.
Tungod sa ilang kabalaka nga adunay dautang nahitabo ngadto sa iyang manghod, nagkadipo-dipo na sila sa pagpangita bisan asa apan pakyas sila nga makit-an kini.Sa milabay nga mga adlaw nawad-an na sila og paglaum nga mapalgan pa si Bernardo mao nga ila na lang kining gisalig ngadto sa labaw'ng makagagahum nga unta luwas kini.
Apan niadtong miaging adlaw nabulabog ang mga tawo sa dihang usa ka patay'ng lawas ang nakit-an sa mga mananagat ilalom sa bangka. Dihang gisusi nasuta nga lawas kadto ni Bernardo. |
