Thursday, November 15, 2007
Davao: 'Nag-sex' sa taxi gipriso (3:04 p.m.)
DAVAO CITY -- Priso kagahapon ang usa ka lalaki ug ang iyang partner nga babaye human sila giingong nasakpan sa pulis nga 'naglangga-langga' sud sa sakyanan sa usa ka pampublikong lugar sa Marfori subdivision, dakbayan sa Davao niadtong Miyerkules sa gabii.
Natanggong pa hangtud kagahapon sa buntag sud sa selda sa San Pedro police station sila si Liza, 34, miangkon nga dalaga apan dunay tulo ka mga anak sa lain-laing amahan, taga-Kilometer 11, Sasa ug si Crispino (mga apilyedo gitago aron kapanalipdan ang dungog sa pamilya), 37, minyo, taxi driver nga taga-Mulig, Toril apan miingon nga anaa siya karon magpuyo sa Skyline, Catalunan Grande diin siya adunay live-in partner.
Alas 11:56 sa gabii giduso sa buhatan sa kapulisan ang duruha.
Matud ni PO2 John Mark Castro, mihimo sila og pagpatrolya sa ilang area of responsibility sakay sa ilang mobile patrol dihang nakadawat sila og impormasyon nga adunay katingad-an nga taxi taud-taud nang miparking sa ngitngit ug may kakahoyan nga dapit sa Marfori.
Giukoy dayon sa kapulisan ang taxi nga nagdala sa plaka numero LWK 738 ug didto giingong ilang nasakpan ang duha nga `nagtagay sa kalipay' sa atubangan nga bahin sa taxi.
Nakugang sa pagbutho sa mga pulis, mipadagan si Crispino sa taxi mao nga gigukod sila sa mga pulis ug didto na naapsan sa Emerald street sa mao gihapong subdibisyon. (Super Balita Davao) |
