|
|
Tuesday, January 15, 2008
Davao: Inahan nagpusil sa anak, gipriso (2:35 p.m.)
DAVAO CITY -- Inahan nga 'nagpusil' sa iyang anak gibalhog kagahapon sa selda sa kapulisan.
Wa hinuon maigo ang iyang anak apan ang ilang 4 anyos nga silingan nga nagduwa-duwa lang sa tugkaran sa ilang bay maoy naigo sa bala sa armas.
Ang insidente nahitabo sa Matina Gravahan, dakbayan sa Davao alas 12:00 sa udto niadtong Lunes, Enero 14.
Ang biktima nga nadala sa Davao Medical Center nailhang si Jodel Paragoya, nagpuyo ra sab sa nasangpit nga lugar.
Gideklara hinuon nga luwas na sa delikadong kahimtang ang bata tungod kay di kaayo grabe ang samad sa tuong paa nga iyang nahiagoman.
Nailhan ang suspek kinsa detinado na sa selda sa Talomo police station nga mao si Phobee Qit Omoyog, 45 anyos, taga-Matina Grabahan gihapon.
Matud ni Rose, iyaan ni Paragoya nga maoy naghatud kaniya sa ospital, nagdula-dula lang ang bata sa tugkaran sa ilang bay samtang ang suspek ug ang iyang anak nga si Dodong nagkalalis.
Sumala sab ni PO3 Rios sa Talomo police, sa panaglalis sa inahan ug anak mikuha si Omoyog sa iyang armas ug mipabuto.
Wa hinuon maigo si Dodong apan si Paragoya ang napurohan sa bala. |
|
|
|
