|
|
Tuesday, January 15, 2008
Gensan: Gipusil; 2 patay, 1 grabe (2:24 p.m.)
By Mel Coronel
GENERAL SANTOS -- Duha ang namatay samtang laing usa ang grabe human gipamusil samtang didto sila sa sulod sa usa ka videokihan.
Matud sa kapulisan sa Tambler Police Station nga alas 11:15 Lunes sa udto didto sa videokihan sila Allan Conjorado, 23 anyos, ug Rolando Butil, 18, pulos molupyo sa Sitio Lanoy Purok Malambuon, Barangay Calumpang.
Samtang nagkanta-kanta ang duha kalit mibutho ang usa ka single nga motorsiklo nga gisakyan sa tulo ka mga tawo. Duha ka tawo ang misulod sa videokihan samtang usa nagpabilin sa motorsiklo. Gipamusil sa duha ka mga
suspek ang mga biktima gamit ang .45 nga kalibre sa armas.
Patay diha dayon sila si Conjorado ug si Butil kinsa natuhog sa daghang mga bala ang ilang kalawasan.
Si Allan nakaangkon og 6 ka mga pinusilan samtang si Rolando dunay tulo ka mga bala ang mitarok sa iyang lawas.
Nadamay usab sa pagpamusil ang usa ka 5 anyos nga si Shiela Mae (apelyido gitago), kinsa daling gidala sa St. Elizabeth Hospital tungod sa igo sa bala sa likod ug natapsingan pa ang iyang ulo. Human sa pagpamusil daling nanibat ang mga suspek padung sa wala matinong direksiyon. |
|
|
|
