Wednesday, February 13, 2008
Inahan na-trauma pagpatay sa anak (2:16 p.m.)
GENERAL SANTOS -- Dili pa gihapon makaistorya hangtud karong panahona ang inahan sa 17 anyos nga habal-habal driver nga gipatay sa tulo ka mga karnaper. Ang inahan sobrang na-trauma ug di makadawat sa gidangatan sa iyang anak.
Si Sabel Dalagan, amahan sa biktimang si Norsaiden Dalagan, molupyo sa Purok Darusalam, Barangay Bawing, ning dakbayan sa General Santos nagbutyag nga dili madawat sa iyang asawa ang kamatayon sa anak nga nakaangkon og 50 ka mga samad dinunggaban gamit ang icepick ug gunting.
Bisan ang amahan naglisod pagdawat sa nahitabo sa iyang anak tungod kay naningkamot kini nga makapangita og laing makwartahan aron dunay magamit sa ilang umaabot nga JS Prom karon untang adlawa, Pebrero 14, apan gibiktima hinuon sa mga karnaper.
"Wala na silay mga puangod sir, kay kanang si Arthur Ali ug iyang mga kaubanan mga kaubanan pa na nako kaniadto sa ako pa na siya nagsakay sa panagatan unya ing-ana ang buhaton nila sa akong anak, dili nako madawat, sa amo lang sir sa Muslim isumbali na sila patyon usab na sila kay brutal ang ilang pagpatay sa akong anak," matud sa naglungot-lungot nga amahang si Sabel.
Apil nga giprobleman karon sa amahan ang kahimtang sa iyang asawa nga si Diana. Si Diana di na maistorya, sige na lang og hinuktok ug di na mokaon. Sun.Star SuperBalita General Santos) |
