Tuesday, February 19, 2008
Selos, kalisod hinungdan sa hikog (4:08 p.m.)
CAGAYAN DE ORO -- Selos ug kalisod sa pamilya mitukmod sa 28 anyos nga asawa diin upat ka buwan usab nga nagsabak, sa paghikog.
"Depressed siya kay walay trabaho ang bana upat ang iyang anak ug buntis pa gyud," pamahayag ni SPO2 Dennis Alinas, sakop sa Puerto Police Station nga maoy nag-imbestigar sa maong kaso.
Naghikog pinaagi sa paghikot og pisi sa iyang liog si Roselyn Armocilla niadtong Sabado sa buntag sulod mismo sa kuwarto sa ilang panimalay sa Zone 2, Greymar, Barangay Bugo ning dakbayan sa Cagayan de Oro.
Ang sister-in-law ni Armocilla mao ang nakadiskubre nga nagbitay ug patay na ang biktima dihang nisulod kini sa kuwarto mga alas 10:30 sa buntag.
Matod ni Alinas nga sa wala pa naghikog ang biktima nagkalalis pa kini sa iyang bana dihang nananghid nga moadto sa bulangan. (ALR) |
