|
|
Friday, March 28, 2008
Cagayan de Oro: Lalaki giluba; tina-e nahabwa (4 p.m.)
NAHABWA ang tina-e sa usa ka lalaki human giluba ug gibundakan pa og bato ug gitusok ang mata sa wala mailang mga suspetsado.
Nagbuy-od ug naligo sa iyang kaugalingon nga dugo ang biktima duol sa Doņa Emeteria Building sa Osmeņa ning dakbayan sa Cagayan de Oro mga alas 2:00 sa kaadlawon sa Biyernes, Marso 28.
Matud pa sa kapolisan, nagginhawa pa ang biktima sa ilang pagrespondi.
Dali nilang gidala ang biktima sa Northern Mindanao Medical Center (NMMC).
Walay nakuha nga identification gikan sa biktima nga mag-ila sa iyang pagkatawo gawas sa pitaka diin picture lang ang sulod.
Ang biktima nagsuot og itum nga short pants nga dunay pink nga bakos, sleeveless t-shirt ingon man insakto lang ang pamanit ug gibanabanang 40 ngadto sa 50 anyos ang pangidaron.
Walay nakakita sa hitabo.
Nagpabilin sa morgue sa NMMC ang patayng lawas sa biktima samtang padayon pa nga giimbestigahan ang posibling motibo sa maong hitabo. (Sun.Star SuperBalita Cagayan de Oro) |
|
|
|
