|
|
Sunday, March 30, 2008
Cagayan de Oro: Liboan ka deboto midagsang (3:25 p.m.)
By Abigail C. Malalis
LIBOAN ka mga debuto sa Divine Mercy gikan sa nagkalain-laing siyudad ug probinsya sa Visayas ug Mindanao ang ningtambong ug ningsaksi sa anibesaryo sa Divine Mercy Shrine sa Ulaliman, El Salvador City.
Malampuson ang gipahigayon nga misa selebrasyon nga gipasiugdahan ni Bishop Elenito delos Reyes Galido sa archdiocese sa Iligan Domingo sa alas 5:00 sa sayong kabuntagon didto mismo sa Divine Mercy Shrine.
Mga debuto nga gikan sa syudad ug probinsya sa Zamboanga del Sur ug Zamboanga del Nerte, Malaybalay, Camiguin, Butuan, Davao, Zamboanga City, Pagadian City, Butuan, Surigao, Lanao del Norte, Ozamis City ug Misamis Occidental lakip na sa Iloilo ug Cebu City sa Visayas ug uban pang mga probinsya sa Visayas ug Mindanao.
Sa homiliya ni Bishop Galido, iyang gisaysay ang kamahinungdahon sa kalawom sa pagtuo sa katawhan labina na gayud niadtong mga debuto.
"Gideklara sa panahon pa ni Pope John Paul ang unang Dominggo human sa Domingo sa pagkabanhaw isip Domingo sa Balaanong Kaluoy o Divine Mercy," asoy ni Bishop Galido. (Sun.Star SuperBalita Cagayan de Oro) |
|
|
|
