Tuesday, April 01, 2008
Davao: Lalaki gibuk-an og ulo (1:53 p.m.)
USA ka 32 anyos nga lalaki gibuk-an og ulo sa mga armadong tawo atubangan sa usa ka tindahan sa Talomo Proper, dakbayan sa Davao niadtong Lunes sa gabii.
Ang biktima mao si Marlon Divino Lara, minyo, way trabaho, molupyo sa Talosa village sa Talomo.
Gikatahapan nga mga sakop sa vigilanteng pundok nga Davao Death Squad ang miihaw sa biktima.
Ang insidente nahitabo alas 8:30 sa gabii samtang si Lara naglingkod-lingkod lang atubangan sa Jag Store nga gipanag-iyahan sa iyang ig-agaw nga si Gary Lara.
Tulo ka wa mailhing mga armadong lalaki nga nagsakay sa duha ka mga motorsiklo nga way plate number ang mitungha duol sa tindahan.
Usa sa mga lalaki miduol kang Lara ug sa way daghang istorya gipikhan ang biktima sa dul-it nga distansya sud sa duha ka higayon.
Gidala pagdali ang biktima sa Davao Medical Center apan namatay ra gihapon kini. (Sun.Star SuperBalita Davao) |
