|
|
Saturday, April 05, 2008
Davao: "Dugo-Dugo Gang" subling namiktima (4:01 p.m.)
LAIN na usab ang gibiktima sa "Dugo-Dugo Gang".
Si Maribel Mabulay, taga-Babak niadtong Biyernes sa ala una sa hapon mitungha sa Davao Medical Center nangita kung hain ang iyang bana nga giingong grabe ang kahimtang human nahulgan og kahoy didto sa iyang gitrabahoan.
Apan nasayran ni Mabulay nga biktima diay siya sa ilad matud sa guwardiya sa DMC.
Miasoy si Mabulay nga usa ka tawo mitungha sa ilang bay sa Babak, nagdala pa gyud og sketch aron matultolan ang ilang pinuy-anan ug nagpahibawo nga nadisgrasya ang iyang live-in partner nga si Bernador Bajan ug gikinahanglan kaayo nga abunohan og dugo kay daghan ang mga dugo nga miagas gikan sa samad sa ulo.
Nakurat sa maong impormasyon, nagkabuang og pangita'g kuwarta si Mabulay, nangutang og 5-6 sa kantidad nga P1,500 aron may ikapalit og dugo.
Gikan sa Babak, gikuyogan pa si Mabulay sa suspek padung sa DMC.
Apan pag-abot sa kanto paliko sa DMC, miingon ang suspek nga kuhaon niya ang P1,500 kay siya na lang ang mopalit og dugo sa Blood Bank ug padiretsohon na lang si Mabulay sa emergency room sa DMC aron maasikaso ang uban pang kinahanglanon sa iyang bana.
Apan sa ospital, way bana niya nga na-admit. Ang guard miingon kaniya nga daghan na silang biktima niining "Dugo-Dugo Gang". (Sun.Star SuperBalita Davao) |
|
|
|
