Saturday, April 12, 2008
General Santos: Ulitawo gitusak-tusak og kutsilyo, patay (12:35 p.m.)
GENERAL SANTOS CITY -- Patay na dihang nakaabot sa balay tambalanan ang 27 anyos human gidunggab og kutsilyo samtang anaa sa usa ka waiting-shed sa barangay Lagao alas 12:10 Sabado sayo sa buntag.
Ang kapulisan sa Lagao Police Station nag-ila sa biktima nga si Regie Bitoy, alyas bitoy, ulitawo, molupyo sa Duran Compound, NLSA Road sakop sa barangay Lagao.
Ang biktima nagtindog-tindog sa waiting-shed uban ang barkada nga si Rex Antona, molupyo sa Purok 10, Cabarlo Street sakop gihapon sa maong barangay.
Kalit lang mibutho gikan sa ilang luyo ang usa ka suspek ug walay daghang istorya gitusak-tusak ang kalawasan sa biktima hinungdan nakaangkon kini og daghang samad sa kalawasan, duha sa iyang walang bahin sa kilid, duha sa liog, lima sa likod ug uban pang mga samad.
Misibat ang suspek sakay sa single nga motorsiklo nga Honda XRM, kolor itom, apan pakyas nga makuha ang plaka ug masikop ang suspetsado nga mipadulong sa Balite Lagao.
Si Bitoy daling gidala sa iyang barkada sa General Santos City Hospital apan si Dr. Panayaman mideklarang dead on arrival sa biktima tungod sa kadaghan sa mga samad nga iyang naangkon.
Ang kapulisan sa Lagao Police Station padayon ang gihimong operasyon alang sa pagsikop sa suspek nga gibana-banang nag-edad og 20 ngadto sa 25, 5'4 ang gitas-on, nakasul-ob og puting t-shirt, asol nga shortpants, gamayon ang lawas.
Gisuta pa sa otoridad kung unsa ang motibo sa pagpanunggab patay sa biktima. (SuperBalita General Santos)
|
