|
|
Wednesday, April 16, 2008
Cagayan de Oro: Sekyu nadumbol, patay (2:13 p.m.)
CAGAYAN DE ORO CITY -- Dili na mahitsura ang dagway sa usa ka sekyu human kini nabanggaan ug gibiyaan sa wala mailang suspetsado niadtong adlawng Martes mga alas 6:00 sa gabii.
Si SPO1 Kenneth Lu Achas, traffic investigator sa Tagoloan Police Station niila sa biktima nga mao si Lolito Gelbolingo, 51, ug lumolupyo sa El Mundo Natumolan, Tagoloan, Misamis Oriental.
Nahitabo ang insidente sa Ganghaan Sta. Cruz sa susamang lungsod samtang pa-ingon ang biktima nga mo-duty sa Iligan Steel nahimutang sa lungsod sa Villanueva sakop sa Misamis Oriental.
Sa pakighinabi sa Sun.Star SuperBalita kang SPO1 Achas, siya niingon nga sakay sa iyang bisikleta ang biktima paingon sa iyang trabahoan dihang kalit kini nga nadumbol sa naghaguros nga owner type jeep nga kolor pula.
Dugang ni Achas nga nadala pa ang biktima sa Tagoloan Polymedic Hospital apan nakabsan gihapon sa kinabuhi tungod sa grabeng bun-og ug samad nga nahiagoman sa iyang pagkalagpot.
Gani maayo gyung pagkaguba sa bisikleta niini ug unang naila ang biktima sa ID nga nakuha gikan sa lawas niini. (Abigail C. Malalis/SuperBalita Oro)
|
|
|
|
