Wednesday, April 16, 2008
General Santos: Ex-army, 8 ka kauban gikiha (2:17 p.m.)
GENERAL SANTOS CITY -- Gipasakaan na og kaso ang usa ka ex-army nga nakuhaan og shabu, armas ug mga bala, uban ang laing walo ka mga kauban nga nangasikop sa ronda sa CIDG, Lunes sa buntag.
Matud ni Police Inspector Francis Sonza, imbestigador sa Criminal Investigation and Detection Group, sa Camp Fermin Lira nga ang mga gikiha mao sila si Joselito Dioquiño, hamtong ang panuigon, kanhing sakop sa 66th Infantry Battalion sa Malapatan, Sarangani province; Jhondave Borinaga, Jestopher Brocoy, Mailyn Mariano, Luisa Mellodaga, Danny Borinaga, Dante Borinaga ug ang anak ni Joselito nga si Cyndy.
Kasong Illegal Posession of firearms and live ammunitions ubos sa PD 1866 ug kaso ubos sa Republic Act 9165 nga illegal posession of dangerous drugs ang unang gipasaka apan posebling madugangan pa kung mogawas nga positibo ang mga nadakpan sa gidiling druga sa drug test.
Kahinumduman nga alas 5:30, buntag sa Lunes, gironda ang grupo human nakakuha og search warrant ang CIDG human nadawat ang taho nga dunay armas nga gihuptan ang suspek nga kanhi sundalo nga gitudlo usab nga nagapayuhot sa makadaot nga druga sa maong lugar. (Mel Coronel/SuperBalita General Santos)
|
