|
|
Saturday, April 19, 2008
General Santos: Namista gipatay (11:55 a.m.)
GENERAL SANTOS CITY -- Patay gilayon ang usa ka 30 anyos nga lalaking namista human gipusil didto sa Purok 6 Lanton, Barangay Apopong Biyernes sa hapon.
Ang gipusil patay giilang si Jonathan Lanciso, minyo, molupyo sa Purok 4 Sitio Lanton, sa maong barangay samtang mga suspek sakay sa single nga motorsiklo, kolor itom nga walay plaka.
Matud pa sa kapulisan gikan sa Makar Police Station nga alas 2:25 sa hapon dihang nagtan-aw sa dulang volleyball ang biktima human nananghid sa iyang asawa nga mamista sa kasikbit nga purok.
Apan samtang naglingaw ang biktima sa pagtan-aw sa dula kalit lang dunay usa ka lalaki nga miduol sa nahimutangan sa biktima ug sa walay daghang istorya gipusil gamit ang .45 nga kalibre sa armas nga miigo sa agtang nga milapos sa iyang likod ug sa liog nga maoy hinungdan sa iyang hinanaling kamatayon.
Ang duha ka mga suspek daling misibat sakay sa single nga motorsiklo apan pakyas ang mga tawo nga makuha ang plaka sa gisakyan sa mga responsable.
Mga sakop sa Scene of the Crime Operative (SOCO) nakakuha og duha ka mga balinis sa .45 kalibre sa armas nga gigamit sa mga suspek.
Mga suspek nanibat sa wala masayring dapit. (SuperBalita General Santos/Mel Coronel) |
|
|
|
