Tuesday, April 29, 2008
Cagayan de Oro: Lending firm gitulis; polis biktima (2:28 p.m.)
CAGAYAN DE ORO CITY -- Gihimulbolan sa mga tulisan ang mga empliyado sa usa ka lending firm human gitulis niadtong adlawng Sabado, Abril 26, 2008 mga alas 6:00 sa gabii.
Si SPO1 Evan Vi¤as, sa Anti-Theft and Robbery Section (ATRS) nagbutyag nga gisulod sa tulo ka mga tulisan ang Arqui Finance Corp., nahimutang sa dalan Mulawan, Barangay Patag ning dakbayan sa Cagayan de Oro.
Sulod sa maong lending firm niadtong higayon ang mga empliyado nga sila si Anna Cris Balase, 32, manager, taga Muco, Barangay Carmen; Mariafe Desalan, 30 ug Hazel Sale, 25.
Naa usab atol sa maong hitabo si PO1 Nelson Bermeo, 28, sakop sa Police Regional Mobile Group (PRMG).
Sa inisyal nga imbestigasiyon sa kapolisan nasayran nga armado og kalibre .45, 9MM, granada ug bayonita ang tulo ka mga tulisan.
Duha sa mga suspetsado ang giingong nagsuot og poncho (gamit kun raincoat sa sundalo) samtang ang laing suspek nagsuot og dust mask.
Nasayran nga labihan ka kusog ang ulan niadtong higayona dihang mama-uli na unta ang mga empliyado kalit nga ningsulod ang mga suspetsado dayon tion og pistola sa liog ni Balase hinungdan sa bun-og nga naangkon niini.
Giingong gibunalan ang ulo ug gipahapa si Bermeo kinsa walay dalang armas niadtong higayona.
Gimandoan sa mga tulisan si Balase nga paabrihan ang vault diin sulod ang P20,000. (SuperBalita Cagayan de Oro/Joey P. Nacalaban) |
