Tuesday, April 29, 2008
Davao: Lineman nakuryente, lawas ug nawong sunog (2:20 p.m.)
DAVAO CITY -- Lineman sa usa ka electric company maayong pagkasunog sa dagway ug sa ubang parte sa lawas human nakuryentihan samtang may gitrabaho ibabaw sa poste sa kuryente didto sa Hinatuan, Surigao del Sur niadtong Lunes sa hapon.
Tungod sa grabeng kahimtang, gidala sa Davao Medical Center ang biktimang si Gilbert Moren, 39, minyo, molupyo sa Bislig City, lineman sa Surigao del Sur Electric Cooperative (Surseco).
Si Engineer Cris Barila, supervisor sa Surseco ug usa sa mga nagdala sa biktima sa Davao Medical Center (DMC), nagtug-an nga nahitabo ang insidente pasado alas 5:00 sa hapon, Abril 28.
Gikabutyag nga may gitrabaho ang biktima sa taas sa poste didto sa San Juan, Hinatuan.
Apan sa iyang pagsuong ngadto sa primary live wire sa poste, giingong nasangit ang biktima hinungdan nga nakuryentihan kini.
Ang maong live wire gikabutyag nga nagbaton sa gikusgon sa kuryente nga 7,620 ka boltahe. (SuperBalita Davao/RCO) |
