Saturday, May 03, 2008
General Santos: Babaye giluba (12:55 p.m.)
GENERAL SANTOS CITY -- Patay na dihang nadala sa balay tambalanan ang usa ka 21 anyos nga dalaga dihang aksidenting nalubaan sa iyang kapuyo-puyo nga tumboy sa barangay Lagao Biyernes sa hapon.
Ang namatay nailhan nga si Jecelith Fuentis, taga Toril siyudad sa Davao samtang temporaryong nagpuyo sa Crossing Conel uban ang suspek nga tumboy nga nailhan nga si Alma Almorio, 20.
Ang suspek nagbutyag nga alas 3:45 sa hapon samtang anaa sila sa ilang puwestong videokihan, nahitabo ang ilang lalis human gisugo sa suspek nga si Alma ang iyang kapuyo-puyo nga manglimpiyo tungod kay moabot ang iyang usa ka higala ug didto niya kini patulogon.
Nagsugod ang ilang lalis dihang wala tumana sa biktima ang sugo sa suspek hinungdan nga nagkadako ang ilang istorya nga nakaabot ngadto sa pagpanunggab.
"Basta nakakuha lang ko og kutsilyo gikan sa taas sa among ref kay didto man namo ginabutang ang kutsilyo, pero wala ko makabalo nga naigo diay siya kay naglalis na man kami, ako lang to nga gikuha aron hadlokon kay dili nako gusto nga ako siyang madapatan, pero nakit-an na lang nako nga nagkadugo na siya unya nagaubo siya, dugo na man ang nagagawas, hinungdan nga nangayo na lang ko og tabang sa nagbaligya og saging sa gawas," matud pa sa suspek nga si Alma.
Ang 21-anyos gidali pagdala sa General Santos City Hospital ug dayong gitabang sulod sa emergency room apan walay suwerte, nabugtoan sa iyang gininhawa ang biktima tungod kay naputol ang ugat sa iyang liog nga naigo sa hait nga kutsilyo. (SuperBalita General Santos/Mel Coronel)
|
