|
|
Thursday, May 08, 2008
Cagayan de Oro: TV sa mga police station wagtangon (2:41 p.m.)
CAGAYAN DE ORO CITY -- Walay pagsupak ang mga hepe sa kapolisan ning dakbayan sa Cagayan de Oro sa kamandoan nga wagtangon na ang telebisyon sa mga presintohan sa tibuok nasud.
Kini human gipagawas ni PNP Chief Director General Avelino Razon Jr., ang kamandoan alang sa tanang kapolisan sa dili pagtan-aw sa bisan unsa nga programa sa telebisyon sa ilang presinto atol sa ilang pag-duty.
Kini nga kamandoan mitumaw human makadawat og daghang reklamo ang hepe sa kapolisan gikan sa katawhan tungod sa pagpasagad sa mga desk officer atol sa ilang duty tungod kay nalingaw sa mga talan-awon sa telebisyon.
Pipila ka mga opisyal sa Cagayan de Oro City Police Office (Cocpo) ubos ni Police Senior Superintendent Isagani Genabe ang nasayod na sa maong kamandoan apan naghulat pa sa pormal nga memorandum order gikan sa ilang labaw.
Sa gihimong pakighinabi sa Sun.Star SuperBalita ngadto kang Police Inspector Buenaventura Reyes sa Police Station 2 (PS2) sa Cogon; Police Inspector Lemuel Gonda (PS1) sa Divisoria ug Police Chief Inspector Dexter Paje sa PS4 sa Carmen sila niingon nga wala silay pagsupak ug andam nila ipatangtang ang ilang mga telebisyon sa presinto sa panahon nga duna nay mando. (SuperBalita Cagayan de Oro/Stephanie S. Viovicente) |
|
|
|
