Thursday, May 08, 2008
General Santos: 27 balay guba sa balod (2:17 p.m.)
GENERAL SANTOS CITY -- Si Sarangani Governor Migs Dominguez misaad nga dili pasagdan ang 27 ka mga pamilya nga nawad-an og mga panimalay sa barangay Lun Padidu, Malapatan, Sarangani Province.
Matud sa Gobernador nga iya nang gitahasan ang Provincial Disaster Coordinating Council (PDCC) aron mangulo sa paghatag og ayuda sa mga pamilya nga nangabungkag ang mga balay tungod sa mga dagkong balod nga mihap sa kabaybayonan sa mga purok San Juan ug Nicolas.
"Automatic ako nang gitahasan ang akong mga tawo ilabi na ang PDCC nga gipangunahan ni Carmelo Latoja aron atimanon ang mga tawo nga naigo sa kusog nga balod daplin sa dagat, every year na ang problema diha sa dapit hinungdan nga sa wala pa mahitabo ang kalamidad amo nang giplanohan ang pagpalit og luna aron kabalhinan sa mga residenti aron dili mabutang sa peligro ang ilang kinabuhi," matud ni Dominguez.
Samtang si PDCC action officer Latoja nagkanayon nga ilang gi-monitor kanunay ang kapin kwatro sientos ka mga tawo nga apektado sa dagkong balod aron masayran kung unsa pa ang ilang gikinahanglan.
Si Malapatan Mayor Aida Sincoy nagbutyag nga mga makaon ang unang gihatag nila sa apektadong pamilya aron dili magutman. (SuperBalita General Santos/Mel Coronel) |
