Sunday, May 11, 2008
Davao: Rambol sa disko; 1 patay, 1 samdam (1:55 p.m.)
DAVAO CITY -- Usa ang natigbak samtang laing usa usab ang samdan ug nagpabilin pa sa ospital sa nahitabong karambola sa grupo sa mga batan-on sud sa usa ka diskohan sa Budbud, Bunawan, dakbayan sa Davao kagahapon sa kaadlawon.
Si SPO1 Roger Danila, imbestigador sa Bunawan police station, sa iyang taho nag-ila sa nakabsan sa kinabuhi nga mao si Jay Mike Asuque, 15 anyos, samtang angol ang iyang kauban nga si Ewald Galaura, 18, pulos molupyo sa purok 11, Tibungco, ning siyudad.
Migula sa gihimong imbestigasyon ni Danila nga nahitabo ang kagubot ala 1:35 sa kaadlawon kagahapon samtang ang mga biktima, kuyog ang ilang mga higala, midayo og disko didto sa Bunawan.
Apan samtang nalingaw sila pag-ayo sa pagsayaw-sayaw sud sa diskohan, kalit lamang silang giatake sa laing grupo sa mga batan-on ug duha sa mga suspek ang miluba sa mga biktima.
Gisapupo gilayon ang mga biktima sa mga mirespondeng ambulansiya sa 911 aron dad-on sila sa ospital apan way suwerte si Asuque kay gideklara sa medical team sa 911 nga patay na tungod sa grabeng dinunggaban sa tuong dughan.
Si Galaura na lang ang nalahos pagdala sa Davao Medical Center ug pabilin pang giatiman sa mga doktor ang samad sa iyang likod. (SuperBalita Davao/Rex C. Otero) |
