Monday, May 12, 2008
Davao: Dispatser sa L300 van gipusil, patay (12:55 p.m.)
DAVAO CITY -- Patay ang usa ka dispatser sa pamasaheroang L-300 van human kini gipusil didto sa dakbayan sa Cotabato niadtong Dominggo sa buntag.
Ang kapulisan nag-ila sa biktima nga mao si Esmael Usop, 37 anyos, minyo ug molupyo sa barangay Bulalo, Sultan Kudarat, Shariff Kabunsuan Province.
Sigun sa taho gikan sa Cotabato City Police Office, nahitabo ang krimen banda alas 11:00 sa kabuntagon, Mayo 11.
Ang biktima, sumala sa imbestigasyon sa kapulisan, nagtindog-tindog lamang duol sa L-300 van terminal sa dakbayan sa Cotabato.
Apan kalit na lamang siyang giduol sa usa ka wala mailhing suspetsado ug gipusil ginamit ang kalibre .45 nga pistola.
Hingkabsan gilayon sa iyang kinabuhi si Usop human naigo sa mga bala tumong sa iyang ulo ug dughan. (SuperBalita Davao/Edgardo Fuerzas) |
