Sunday, May 18, 2008
Davao: Balutero, gipusil - patay (12:40 p.m.)
DAVAO CITY -- Tindero og balut gipusil patay sa wa mailhing armado samtang samdan sab ang iyang uyoan nga naigo sa saag nga bala didto sa Tibungco, dakbayan sa Davao niadtong Sabado sa gabii.
Hingkabsan sa kinabuhi pipila ka minuto sa pag-abot sa Davao Medical Center ang biktimang si Herodel Velez Jr., 24, ug pabilin pang gitambalan ang uyoan niyang si Victoriano Velez Jr., 52, balut vendor sab, pulos molupyo sa Bayside, Tibungco, ning siyudad.
Si SPO1 Arnel Masauding, imbestigador sa Bunawan police station, nagtug-an nga nahitabo ang insidente alas 9:20 sa gabii samtang ang duha nagbantay sa ilang baligya nga balut sa ilang gamay'ng payag-payag daplin sa highway sa Kilometer 18, Tibungco.
Apan samtang nagtindog si Herodel duol sa sudlanan sa balut, usa ka wa mailhing suspetsado miduol ug gidiretso pagpusil sa iyang ulo ang batan-on.
Milapos ang bala hinungdan nga naigo sab sa iyang tuong abaga ang iyang uyoan nga naglingkod sa iyang duol.
Dugang ni Masauding nga human sa insidente, nagdagan ra ang nag-inusarang suspek sa iyang pagsibat. (SuperBalita Davao/RCO) |
