|
|
Friday, July 04, 2008
Davao: 2 patay, 4 samdan sa away sa duha ka pamilya (1:35 p.m.)
DUHA ang patay ug upat ang nasamdan sa panag-ingkwentro sa duha ka mga armadong pamilya didto sa Central Mindanao.
Sigun sa taho gikan sa Maguindanao Police Provincial Office nga banda alas 5:00 sa buntag, Hulyo 4, subling nag-abot ang grupo nila Kumander Teng sa Moro National Liberation Front (MNLF) ug Kumander Amzar sa Moro Islamic Liberation Front (MILF) sa utlanan nga bahin sa Datu Piang, Maguindanao ug Barangay Kadingilan, Midsayap, North Cotabato.
Nahitabo ang halos duha ka oras nga katag-katag nga pinusilay tali sa duha ka mga grupo gamit ang mga tag-as nga matang sa armas.
Gumikan sa kaguliyang, gatusan ka mga sibilyan ang namakwit sa kahadlok nga maipit sa panag-ingkwentro. Nahunong lamang ang kagubot sa diha nga nahiabot ang GRP/MILF Ceasefire Committee kinsa nakigsulti sa duha ka mga grupo kabahin sa away sa ilang matag pamilya sa yuta nga giugmad.
Milihok na ang mga lokal opisyal aron matabangan ang mga bakwit nga mihikling gikan sa mga apektadong barangay nga temporaryo nga nanimuyo sa mga luwas nga tulunghaan sa Poblacion, Datu Piang. (Sun.Star SuperBalita Davao/Sunnex) |
|
|
|
