|
|
Friday, July 04, 2008
Siguridad ni Manny sa Gensan, andam na (2:15 p.m.)
MGA sakop sa Joint Taskforce Gensan ug General Santos City Police Office nangandam sa paghidangat ni Peoples Champion Manny "Pacman" Pacquiao dinhi sa dakbayan sa General Santos.
Nasayran nga alas 4 kagahapon sa kaadlawon, Biyernes, nahidangat si Pacquiao sa Ninoy Aquino International Airport (NAIA) uban ang asawang si Jinky ug mga kauban human sa iyang away sa Mandalay Bay resort sa Las Vegas niadtong Dominggo batok kang Jose David Diaz.
Si Manny gisugat sa iyang inahan nga si Dionesia, uban sa iyang tulo ka mga anak nga mibiyahe pa gikan sa Gensan padulong sa Manila aron lang sugaton si Manny.
Gilauman nga daghan pang mga imbitasyon ang tambungan ni Manny. Mihangyo kaniya si Department of Environment and Natural Resources (DENR) Secretary Lito Atienza sa pagtambung sa usa ka parada sa Manila aron makit-an sa katawhan.
Si General Santos City Mayor Pedro Acharon Jr. daan na nagbutyag nga bisan unsang orasa nga mahiabot sa siyudad si Pacman andam na ang mainitong pagsugat kaniya nga gipriparar sa siyudad human sa iyang kadaugan sa ika-upat nga titulo. (Sun.Star SuperBalita General Santos/Sunnex) |
|
|
|
