Monday, July 07, 2008
Davao: Aswang nga nanghasi sa kahayupan gisusi (12:43 p.m.)
ASWANG nga miatake sa siyudad sa Kidapawan natumbok na.
Giklaro ni Barangay Sudapin, barangay chairman Bernardo Javier nga ila na nga nasuta kon unsang klase nga hayop ang mipatay sa 21 ka karnero ug 10 ka kanding sa ilang dapit pinaagi sa pagpaak sa liog niini.
Matud pa nga gisuyop ang dugo sa mga hayop ug gikaon ang tanan nga laman-loob.
Ang grupo mismong mga irong buang nga nakit-an sa mga sibilyan nga mikunis-kunis sa mga naasoy nga hayop.
Apil usab nga gi-imbestigahan sa mga barangay opisyal ang usa ka dakong langgam nga nadakpan sa Barangay Manungol nga gikatuohan nga aswang apan nagbag-o lang sa iyang hitsura.
Apan kadaghanan sa mga molupyo sa maong dakbayan dili motuo nga iro ang mipatay sa mga binuhing kahayupan sa mga residente sa Barangay Sudapin ug Manungol gumikan ang agi sa pinaakan sa mga karnero ug kanding morag manananggal naghimo gamit ang tag-as nga ngipon o pangil.
Hangtud karon gibalaka sa mga sibilyan nga basin sunod atakihon sa maong aswang mao na ang tawo. (Sun.Star SuperBalita Davao/Sunnex) |
