Monday, July 07, 2008
Gensan: Pacquiao miabut na (12:37 p.m.)
SI PAMBANSANG kamao Manny "Pacman" Pacquiao nahidangat na sa dakbayan sa General Santos karong adlawa, Lunes, sakay sa Philippine Airlines gikan sa Manila uban sa iyang asawa ug tulo ka mga anak.
Si Pacquiao gisugat sa iyang inahan nga si Dionesia ug amahan nga si Rosalio sa tarmak sa General Santos City International Airport uban sa iyang igsuon nga si kapitan Ruel sa Barangay Apopong.
Misugat sab kang Manny si General Santos City Mayor Pedro Acharon Jr. Apan sa wa masayring rason karon lang nga higayon nga wala makasugat si 1st district congresswoman Darlene Antonino Custodio.
Sama sa naandam, apil nga misugat kang Manny ang mga sakop sa Joint Task Force Gensan (JTFGensan) gumikan kay ang bosidor usa man ka reservist ug ang iyang mga kaubanan sa Guardians, mga silingan sa mga Barangay Labangal ug Lagao.
Si Pacman misakay sa usa ka sakyanan nga pormang karo nga dunay desinyong korona human sa iyang kadaugan. Upat na ka mga bakos ang gihuptan karon sa pambansang kamao sa nasud. (Sun.Star SuperBalita General Santos/Sunnex) |
