Saturday, September 06, 2008
General Santos: Giluba, patay (1:45 p.m.)
USA ka mananagat namatay human gitabangan og luba sa mag-amahan sa barangay Calumpang ning dakbayan sa General Santos alas 6:30 sa buntag, Biyernes.
Ang kapulisan sa Tambler Police Station nag-ila sa biktima nga si Cerelo Ismael, 57, minyo, molupyo sa purok Catapang Heights sakop sa maong barangay.
Ang mag-amahang suspek nailhan nga sila si Franco Cona, amahan, hamtong ang panuigon ug Ric-Ric, 19, ulitawo, molupyo gihapon sa nasampit nga lugar.
Matud sa kapulisan nga suod nga maghigala ang pamilyang Ismael ug Cona isip silingan apan nahitabo nga nagkabangi ang mga nahisgutan una pa nahitabo ang pagpanulong sa duha ka mga suspek ngadto sa panimalay sa biktima.
Si Jeje, anak sa biktima, nagbutyag nga kalit lang silang gipangsulong sa mga suspek human nasuko nga matud pa gikasab-an ug giinsulto sa iyang amahan ang usa ka lalaki nga higala sa mga suspek tungod sa iyang gihimong pagpangwarak sa kasal sa anak sa biktima. (Mel Coronel/Sun.Star Super Balita General Santos) |
