Tuesday, September 09, 2008
Cagayan de Oro: Mag-uuma gipatay, gisunog (1:45 p.m.)
USA ka sunog ug patay'ng lawas sa usa ka mag-uuma sa mismong umahan niini sa Sitio Hagpa, Barangay Mindualo, lungsod sa Magsaysay, Misamis Oriental and napalgan.
Ang biktima mao si Basilio Ednilan, hingkod ang panuigon, molupyo sa susamang dapit.
Si Elmer Ednilan, anak sa biktima miingon nga lima ka mga adlaw na ang ninglabay dihang nawala ang ilang amahan.
Nasayran nga katapusan nilang nakauban ang ilang amahan niadtong Agusto 28 didto mismo sa gipanag-iya niining 20 ka ektrayang umahan dihang ila kining gibistahan.
Apan wala nila nakita ang biktima sa ilang pagbalik ug pan-os nga mga pagkaon ang ilang naabtan.
Ila na lamang napalgan ang lawas sa ilang amahan nga patay na ug sunog pa gyud. Gitabonan lamang kini og lukay ug halos dili na maila ang hitsura.
Buak usab ang ulo niini ug wala na ang mga binuhi nga mananap. (Stephanie Viovicente-Berganio/Sun.Star SuperBalita Cagayan de Oro) |
