|
|
Tuesday, September 09, 2008
Compostela Valley: 9 barangay ubos na sa state of calamity (2 p.m.)
GAWAS sa barangay Masara, lain pang walo ka mga barangay sa Maco, Compostela Valley Province ang gipailawom sa state of calamity.
Kini mao ang mga barangay Barili, Elizalde, Teresa, Mainit, Panaraon, Tagbaros, Panibasan ug Limbo. Sumala ni Maco Mayor Voltaire Rimando nga kining maong mga barangay nag-ungaw gihapon sa peligro tungod kay anaa kanunay ang hulga sa landslide.
Sayo niini, si Rimando nagkanayon nga hingusgan niya ning higayona nga di na gyud papuy-an pa ang barangay Masara human kini giigo sa tulo ka mga landslide sud lang sa usa ka tuig ug usa ka buwan.
Sumala ni Rimando nga gideklara na nga "no-man's land" ang Masara human sa landslide niadtong Agosto 7, 2007 nga mikalas sa 11 ka mga kinabuhi.
Gidugang sa mayor nga nanginahanglan siya og P1 million aron pagpangita og relokasyon sa kapin 300 ka mga pamilya nga nag-istar sa Masara.
Ang mayor mihimakak sab nga ang small-scale mining maoy hinungdan sa landslide. Sumala kaniya nga ang minahan sa lugar nahimutang sa barangay Teresa ug dili sa Masara.
Iyang gibasol mao ang kusog nga ulan ug ang kahumok sa yuta sa lugar.
Gilauman nga mosaka pa ang ihap sa mga namatay sa higayon nga makubkoban na ang nahibilin pang missing, kinsa gituohan nga patay na.
Sa labing uwahing ihap nga nakuha sa Superbalita kagahapon sa buntag gikan sa Office of Civil Defense, mikabat na sa 14 ang ihap sa patay human nakubkoban na ang patay'ng lawas ni Brgy. Captain Jovencio Anquera ug lain pang tulo niadtong Lunes.
Ania ang mga ngalan sa mga biktima:
Namatay
Esteban Namilit 59; Rosemarie Labor 28; Ma. Christine Labor 4; Ma. Theresa Labor 1; Harold Sanchez 53; Aaron Christy Fernando 9; Lourdesito Magnanao; Edelyn Cellano 8; Fedecia Herasta; Eugene Perales 17; Brgy. Capt. Jovencio Anquera 56; Elmer Mesa; magtiayong Ruben Sulapaz ug Norma Sulapaz.
Missing
Merlita Semborgo 41; Joel Cortez 35; Teodoro Velasquez 56; Jing-Jing Anquera; Kenneth Anquera; ang 8 ka bulang apo ni Brgy. Capt. Anquera; Romeo Monjas 50; Esmeraldo Carreon 31; Jose Sajolan 35 ug Ryan Pinsa 17.
Lain pang 29 ang nasamdan apan luwas na sa delikadong kahimtang. (RCO/Sun.Star SuperBalita Davao) |
|
|
|
