Saturday, October 11, 2008
Davao City: 6 ka mga barangay nasiplatan ang MILF (2:29 p.m.)
DALING gisubay sa kapulisan ang taho nga unom ka mga barangay sa lungsod sa Jose Abad Santos, Davao del Sur, subling nasiplatan ang presensiya sa mga rebeldeng sakop sa Moro Islamic Liberation Front gikan Huwebes.
Duha ka grupo sa 1104th Provincial Mobile Group ang gipadala sa dapit nga gipanguluhan ni Inspector Glenford Alberto, aron susihon ang maong taho sanglit gikabutyag nga armado sa tag-as nga kalibre sa mga armas ang maong grupo.
Ang mga barangay sa Sugal, Nuing, San Isidro, Quaipo, Mol-mol ug Butulan, pulos mga kabaybayonang lugar, maoy giingong gidunggoan sa MILF.
Mihimo sab ang kapulisan og pulong-pulong ngadto sa mga molupyo sa Mol-mol aron kuhaon ang ilang kooperasyon sa pagtabang pagbantay sa mga rebeldeng Moro.
Apan sumala ni Alberto nga wa na dinha ang mga armado sa ilang paghidangat.
Bisan pa man niini, wa mokompyansa ang kapulisan sanglit dako ang ilang pagtuo nga nagpahipi lang sa daplin ang mga sakop sa MILF ug mohasi kung makakita og kahigayonan. (Dondon Dinoy/Sunstar SuperBalita Davao)
|
