Monday, October 27, 2008
Davao City: NPA gilutos na (4:36 p.m.)
MGA miyembro sa New People's Army nga misulong sa Cafgu detachment sa Barangay Luna Sur, Makilala, North Cotabato, gisilotan sa mga militar ug kapulisan.
Ang maong mga miyembro misulong sa Cafgu niadtong Sabado sa alas 10:25 sa buntag.
Usa ka miyembro sa Citizen Armed Forces Geographical Unit (cafgu) nga si Antonio Kikoy hingkabsan ug kinabuhi sa maong engkwentro.
Sila M/Sgt. Felipe Bernante, detachment commander, Ronie Adajar, Ramil Gonzaga ug Roberto Gulada, mga Cafgu nga nakabase sa Dole-Standfilco nasamdan usab.
Nailog usab gikan sa mga rebelde ang 16 ka mga tag-as nga matang sa armas.
Nagpabuto ug landmine ang mga rebelde samtang naswertehan ang mga sundalo nga walay naangol kanila.
Matud ni Makilala chief of police, Inspector Ramil Hujilla, niangkon ang Palamine Command sa New People's Army, nga nanimalos lang sila sa mga abuso sa katawhan sa management sa Dole-Standfilco.
Matud pa nga ang management barat mohatag ug sweldo sa ilang mga trabahante.
Kusog usab, matud nila, mo harass ang mga Cafgu sa mga sibilyan.
Depensa ni AFP Vice Chief of Staff Lt/Gen. Carduzo Luna nga walay basehan ang mga akusasyon sa mga NPA tungod kay mismo ang mga sibilyan nagreklamo sa ilang pangilkil ug revolutionary tax. (Edgardo Fuerzas/Sun.Star SuperBalita Davao) |
