Friday, January 04, 2008 Commentary: Mayap a Gubyernu
MAYAP a gubyernu, ustu at marangal. Kasanting na yatang pakiramdaman! Dapot king santing na kasakit nang panintunan? Inta baket kaya? Nanu ya wari ing Tune at Mayap a gobyernu? Nanu wari ing pakimasalan da ring tau?
Pagumpisan taya king metung a bale. Nung no ing Tatang yang 'padre de familia' at ing indu yang 'madre de casa'.
Makanyan mu naman deng anak ra, ilang karelang gugubyernwan -- yusturyal da king ustu at maling parasan.
At deng aduang pengari dadala do reng anak da king masampat a kabilyan. Ban king tauling aldo ing tagimpan, yang akit da at karin la magduyan.
Makanyan ya mimiral ing gubyernu king pamilya. Iti madadapat nung ating pamikalugud, pamisanmetung at pakiramdaman.
At pekamaulaga nung ing Ginung Diyos yang sentru ning metung a pamilya.
Idala ku ne man iting pisasabyan king gubyernu ning iskuela a nung no ring estudyanti, ilang magsilbing memalen.
At deng mestra at mestru ilang mituturu karela. Dila reng magsilbing pamuntuk at pekaasyas ning kabiasnan papunta king masampat a parasan, at tune katuliran.
Dapot ngeni ipildis ke ing tema ning pilalabanan. Ilipat ke dalan ing tema ning pisasabyan.
Idala ke iti king sidwan ning komunidad. A nung no reng pulitiku ilang pamuntuk at lider tamu.
Bilang pamuntuk dapat atin lang takut king Ginu at lugud karing kapara mu tau.
Dapat deti tapat la at masanting ing imbut da karing karelang sasakupan, at karing parasan ning balen.
At bilang estudyanti, anak at memalen, nanu ing agawa ku ban makasaup king pamibantug na ning Mayap a gobyernu o tapat a pamamalakad?
Anting anak, marapat mung karing pengari ku makiramdam ku.
Uling balu ku ala lang aliwang buri para kanaku nunge ing mirinan masanting a kabilyan king aldong maula.
Balang sasabyan dang aral marapat mung pakiramdaman at ipakit karing kapara kung anak king o kareng kanakung kimut, amanu at pamikaluguran.
Bilang estudyanti dapat at dapat ibie ku ing tapat a pamakiramdam karing kanakung mestra at mestru.
Dapat ku la mu namang dinang respetu antimo ing respetung babie ku karing pengari ku.
At dapat ku lang pamintuan anti mo reng pengari ku. Uling ila deng kaduang pengari ku king balidad na ning yatu.
Bilang memalen, dapat maging mayap kung ehemplu karing kapara kung tau.
Dapat tukian ko reng anggang pulisiya ning komunidad a nung no makatuknang ku.
Eku gagawang dapat a Malaysia king komunidad at makasakit karing kapara ku tau.
Nung sakaling atin kung e buri karing mamuntukan dikil karing karelang gawa at katuliran, 'pangadi' yang pekamasanting kung ablas at mangadi yang pekamasanting kung gawan.
Uling agpang king makasulat king Banal a Kasulatan, nung atin lang maling gagawan ding manungkulan, pangadi mu la king Ginu ban akit de ing tune dalan ning katuliran.
Bilang pangwakas, Mayap ya ing gubyeru o pamamalakad da ring mamuntukan nung ating lugud, pakiramaman at pamisanmetung.
Mayap ya ing palakad da ring mamuntukan nung balang metung atin lang takut king Ginu at nung balang tinagal at milukluk king katungkulan atin lang lugud karing kapara da tau.
Lugud a dalise, tapat at masapsap.
At ing metung a memalen, responsabli ya at tutu yang mayap nung mamintu ya karing keyang pengari.
Pakiramdaman no reng kayang mestra at mestru at pirarakayan da ing respetu. Tutuki ya karing batas ning komunidad a nung nokarin makakayabe ya at ing Ginung Diyos yang
sandalan na nung nanu mang marawak a akakit na king gobyernu.
Uling ing tune dalan ning katuliran maumpisa king takut mu king Ginu.
At ing dalan ning kabiasnan ya pin ing tune dalan ning mayap a gubyernu.
At aku responsabli ku nung babie ku ing saup ku king gubyernu.
Roilingel Carreon
Holy Angel University (HAU)
1st placer in the Aldo Ning Kapampangan
Essay Writing Contest's College Category
