Sunday, March 16, 2008 Garcia: Ing Pamagsalbat - Daun Ya Kang Kristo? By Kragi B. Garcia Kapisik
MARAYUNG malyari karing miyaslagan nang sadya, ding mekatakman na king pigkalub ning banwa, at mekidake na la king Nwan A Diwa, at tikman da na ing masampat nang amanu ning Apung Ginu at bang ding upaya ning yatu datang la't miparayu lang pasibayu bang mibayung pasibayu king pamanisi pauli ning papaku reng pasibayu ing anak ning Apung Ginu at layun deng pagsisti.
-Ebreu 6:4-6
Buri ku mu pung ibulalag ing malungkut a balita -meyangu ne bye ing Indu ning Pamitalubu ning Kalinangan Kapampangan - i Dr. Evangelina H. Lacson napun ka-4 ning gatpanapun (Marsu 15, 2008) kaybat deng tinggal ing "respirator" agpang king kapagnasan na.
Syamapulu't metung neng banwa ketang Oktubri 7, 2007. Saupan taya sana pung ipangadi king ikapayapa na't masampat nang pamanuli king Miglalang.
*****
Ating mapilan karing kabalen tamu ing mag-penitensya o magsalbat kanu neng panaun ning maledo at deti ila pin ding king Kutud king San Fernando.
Iti gagawan da pang kapanintunan ding memaranggay king saup ning kapamalan pang-lakambalen at panglalawigan.
Iti gagawan dang pangyagyag karing dalo aliwang bangsa o aliwang balen mu man.
Makananu kaya ing talakad nang Amung Gob ngening ya na ing tatalan king kapamalan pang-lalawigan?
Deng aliwa libut-libut lang daralo karing miyayaliwang pisamban kambe ring dane a magpuni. Saplid-sapliran da ing katawan da o ating aliwang sasaplid karela.
Dapot atin kung akakit a neng magpaynawa la, sisindi lang sigarilyu.
Makananu ing gagawan da reti? Keraklan mamusan lang salapung o krus a agyu dang agyung dalan at kambe na niti makatalukbung la at ating tuki-tuking babalasbas bagya o itang agyu rang pibatan lakwas na pata no balat king saplid.
Deng magsalbat sarya dang susugatan ing balat da bang ating magus a daya.
Ing tutu, nung tumagun ka king pamipaku king Kutud, abau mu ing sasalingalngal a lanam ning daya.
Ating pang sasabing bayu at kaybat dang magsalbat minum la pang alak o mekad ding aliwa -- "batu" o bawal a panulu! Mekad pin e da na panandaman kanita ing kaplas.
Ninu ing mumulangan da? Mumuna -- gagawan da ing pamagpakasakit ayti anting daun da at kadwa keta papakit da ping lalasa lang tutu.
Dapot ing alak o panulu makapata at makabye kabal bang e mu takman ing sakit o kaplas balat.
Kanita na mesambut ing parasan dang midaun kasakitan. At kanita mu naman magmula ing kapamiraytan e mu karing sarili da nung e karing manakit karela.
Wa pin at panakitan ning baranggay at ning lalawigan iti dapot bala mu mababang uri iti ning kapanintunan. Ing tutu, magi pa iting sangkan bang pagsisiti da ka tamu deng aliwa bista man ding aliwang dalo tatala da iti kareng video da at stills camera.
Mekad lalto tamu pang barbaric o savages karing aliwang bangsa anti ing papalto ring Kastila at lakwas na ring Amerikanu inya pin detang mangakaba bwak kanung Makabebe Scouts ila ring makatala karing aklat indat pisasabyan la ring Kapampangan.
E la tutu reta nung e pepalwal la mu bang ipakit ing itamu pin e ta pa bangsang sinulung nung e mengari ta pa karing cannibals.
Nanu kanita ing dapat ipagmaragul? Nung atin mang mangakaba bwak karing Macabebe Scouts -- atin mu naman karing aliwa lakwas na ring insurrectos o revolutionary armies nang Aguinaldo.
Nung e man antita -- balamu circus ing panakit da. E ata makatula ita at malyaring ipagmaragul nung paulagan mu ing katasan na uri ning angkan Kapampangan o sanu mang lipi. Nung e ta pa aulata ita angga ngeni -- balamu e manayun.
Metung pa, e kaylangan pa ing pasakitan ya ing katawan bang apamatulan ya ing Apung Ginu.
Alang ibpa o pengari ing matula yang akakit na la ring anak nang magakakasakit king e makabaldugang sangkan. Ing nasa ning Apung Ginu ya pin ing luguran ta ya.
Anti ning sinambitla nang Makamal a Panginwang Kristo: "Luguran Ya ing Ibpa kapamilatan ning tibubus mung pusu, tibubus mung isip at tibubus mung diwa."
E na sinabing magsalbat ka't pasakitan ing katawan mung anti king gagawan ding mapilan... nung tutu man ing pamagsalbat da. Nung gewa na man ing pepabustan nang mipaku ya king salapung, ita migulis na king palad na anting tapat a lulugud king Ibpa.
Metung mu namang daun a tapat at alang samut a kaparatutan.
Palage ku kalabisan na ing sambitlan ku pa iti at iti dindam ku nang paulit-ulit panaral ding pari dapot angga pa mu rin king panaun ayti magaganap pa mu rin ing anititi.
Mu pin -- ing sadyang gawi masakit itabili!
*****
Pupugayan ke pu ing bayung Parish Priest ning San Nicolas de Tolentino, Makabebe -- Amung Ted Valencia, pauli ning kabalitan a mayap nang pamanibala king kayang sasakupan ngeni.
Pauli na misubli ya ing limbun pangmaleldo neng Myerkulis Santo at dakal kanu ing mibabayung mangasanting.Lwid ko pu, amung!
Masampat a Paruminggung Nwan kekayung sabla!
*****
Nung bisa kang mambag kawatasan, kapusungan o nanu man, o nung atin kang munikala o sisti, malyari kang makipagtalamitan king talasulat king text o CP: 0919-6940-224 o parala king email: garciakragi@yahoo.com.
