17 anyos nakalingkawas sa pagpanglugos

NASANGIT sa punoan sa kahoy ang 17 anyos human miambak ug nakalingkawas gikan sa mga kamot sa duha ka magsuon nga misuway og lugos kaniya niadtodng nilabay'ng adlaw sa Barangay Balubal, ning siyudad sa Cagayan de Oro.

Giila ang biktima nga mao si Mary, bansagon gipugngan, 17, residente sa P-3, Puerto ning siyudad.

Si PO3 Arnel Calibho sa Police Station 6 (PS6) sa Puerto nibutyag sa Sun.Star SuperBalita nga mobisita unta sa iyaan niini sa Balubal si Mary ug didto na matulog niadtong gabhiona, hinungdan misakay og habal-habal dihang kalit lang gihunong sa ngitngit nga bahin sa driver nga giilang si Junior Bago ug igsuon niining si Dodo, mga residente sa P-7, sa Balubal.

Nimando ang mga suspek nga pahuboun ang biktima ug unang gigakos ug gihagkan apan kusog nga gisipa ni Mary, hinungdan nga nakalingkawas kini.

Gigukod ang dalaga paingon sa kasagbutan nga bahin hinungdan nga dihang nakapaingon kini sa pangpang miambak si Mary ug maayo na lamang kay nakasangit sa punoan sa kahoy.

Gipasalamatan nga wala na usab misunod sa pag-ambak ang mga suspek sa pagtuong nabunal na ang biktima sa ubos nga bahin.

Tungod sa kakapoy sa biktima, nabuntagan kini sa punoan sa kahoy usa pa nakapangayo ug tabang.

Gidala pagdali sa Northern Mindanao Medical Center human nakaangkon og pangos sa kalawasan.

Matud ni Calibho nga dihang gipangita na sa kapolisan ang mga suspetsado, wala na kini sa panimalay ug posibleng misibat na. Ang inahan sa biktima desididong pasakaan og kaso ang mga suspetsado.

Sa pagsulat ning balita, nagpabilin pa sa balay tambalanan ang biktima nga padayon pang giatiman sa mga doctor.