2 'drug pusher' sapon sa buy-bust

DUHA ka mga gituohang mamaligyaay og ilegal nga druga ang sapon sa buy-bust operation sa managlahing dapit ning siyudad sa Cagayan de Oro.

Nasikop sa mga sakop sa Philippine Drug Enforcement Agency, Regional Office-Northern Midnanao (PDEA-10) si Angco Ibrahim, 36, minyo, taga Magno Compound, Bolonsori, Camaman-an ning siyudad.

Ang operasyon gipangulohan ni Regional Director Lt. Col Edwin F. Layese (Ret) diin nasapon si Ibrahim nga namaligya og usa ka pakete nga adunay sulod nga gituohang shabu niadtong Sabado mga alas 3:00 sa hapon sa Sto. Niño, Barangay 31 ning siyudad.

Nakuha sa posisyon niini ang usa ka pakete nga adunay gihapon sulod nga shabu ug duha ka mga tag-as nga cellophane.

Ang arestadong suspek nagtingkagol karon sa prisuhan sa PDEA ug gikatakdang pasakaan og kaso.

Samtang laing iladong drug pusher ang naaresto usab sa mga sakop sa Police Station 7 (PS7) sa Bulua niadtong nilabayng adlaw sa West Bound Terminal, Bulua ning siyudad.

Nakuha gikan sa 20 anyos nga mao si Johary Dirampatan Macalipot, taga Barangay Lumbia ning siyudad ang upat ka mga pakete sa gituohang shabu dihang giatangan kini sa kapolisan sa maong dapit.

Giaresto ang suspek dihang usa sa polis sa PS7 ang nagpatuong buyer sa gibaligya niining ilegal nga druga.

Nagtingkagol si Macalipot ning panahona sa Maharlika Detention cell. (SVB)