2 ka tulis sa usa lang ka oras

USA ka gasoline station ug convenience store ang gitulis nga pulos nahimutang sa area sa Police Station 4 sa Carmen ning siyudad kagahapon sa kaadlawon sulod lamang sa usa ka oras.

Unang insidente nahitabo mga alas 3 sa kadlawon diin ang Golden Access Convenience Store sa Kauswagan Highway ning siyudad sa Cagayan de Oro gisudlan sa lima ka mga armadong lalaki.

Gitionan ang sekyu sa maong establisimento nga mao si Rolando Apol ug gidis-armahan sa iyang kalibre .38 hinungdan nga wala makasukol.

Si Apol, ang security guard sa maong 24 oras nga convenience store ug Phoenix gasoline station nga sirado na niadtong tungora.

Si Michael John Deloso, hepe sa PS4 sa Carmen, nibutyag sa Sun.Star Superbalita nga walay kamatuoran ang taho nga ang gasoline station maoy gitulis tungod kay sirad na kini niadtong tungora.

Dugang ni Deloso misulod ang lima ka mga tulisan sa tindahan ug nanguha og duha ka 1.5 sa litro nga softdrinks.

Ang kapolisan dili makatuo labina nga pulos armado ang mga lalaki ug litro lamang ang gipangkuha niini.

"Kung tulis gyod ang ilang tuyo, gipangkuha na nila ang mga kwarta nga halin sa convenience store pero walay kwarta nga nakuha," ni Deloso.

Nag-iyahay sa pagpanibat ang mga suspetsado ug nisakay sa naghulat nga kolor pula nga multicab.

Gibutyag sa sekyu nga posibleng usa sa rason mao nga wala nidayon pagpanulis ang mga tulisan tungod sa presensya sa mga polis nga nag-jogging niadtong tungora.

Tungod niini nidali sa pagpanglakaw ang mga tulisan ug labaw sa tanan adunay CCTV camera sulod sa establismento.

Apan pagsusi sa mga polis sa CCTV wala silay nakitang mga tulisan nga nanguha og baligya niadtong tungora. Hinuon ang kaso gisunod na sa PS4 alang sa masusing imbestigasyon.

Samtang laing pagpanulis natigayon pagka alas 4:00 sa kadlawon sa Ilaya, Carmen ning siyudad diin usa ka gas boy sa Petron gasoline station ang nakuhaan og P9,600 nga halin niadtong gabhiona.

Nasayran gikan kang Deloso nga ang maong gas station walay CCTV camera, walay security guard nga nakabantay ug walay kahera ug gas boy lamang ang mohupot sa halin.

Gawas niini, buntag na nga nag pa blotter sa ilang buhatan ang biktima nga gas boy hinungdan wala gyod kini marespondehan.

Nahibaw-an nga nagpatuong kostumer ang duha ka mga lalaking sakay sa kolor pula nga motorsiklo nga walay plaka apan nakurat ang gas boy dihang kalit lang nga nanion ug nideklarar og hold-up.

Human nakuha ang kantidad dali nga misibat ang mga suspetsado sakay sa motorsiklo. Hinuon sa pagsulat ning balita gisunod na sa kapolisan ang kaso. (Stephanie V. Berganio)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph