52 gikan sa Northern Mindanao mipasar sa PMA

SA 228 ka mga napili sa Philippine Military Academy bag-o lang, 52 lamang niini ang nagumikan sa Mindanao.

Kini ang gipahibalo sa 4th Infantry "Diamond" Division tungod kay bag-ohay lang gipahigayon ang labihan ka estrikto nga proseso sa pagpili nga makasulod sa Philippine Military Academy (PMA).

Ang 52 ka buok nga gikan sa Mindanao nipahigayon sa ilang examination sulod sa Camp Edilberto Evangelista sa Patag, ning siyudad.

Ang Diamond Division maoy nag-host sa PMA entrance examination sa tibuok Mindanao niadtong August 29, 2010.

Liboan ka mga grupo sa mga kabatan-onan ug kababayen-an ang ni-apply niini nga moabot sa 15,486 sa tibuok nasud. Apan 8,007 lamang ang nakahimo sa written ug mental examination nga gihimo niadtong August 29, 2010.

Sa mokabat 8,007 ka mga batan-on nga nikuha og PMA entrance examination, 1,192 lamang ang nipasar sa exam nga adunay 15 porsinto nga passing rate.

Ang maong mga nipasar gi-required nga mopahigayon og kumpleto nga physical ug medical examination nga gihimo sa tulo ka lain-laing estasyon sa Luzon, Visayas, ug sa Mindanao.

Ang medical ug physical examination gihimo aron pagtino kinsa ang angayan nga moserbisyo base sa ilang mental, physical, emotional ug psychological nga aspeto.

Dako ang pasalamat ni Major General Victor A. Felix, ang Commander sa 4th Infantry Division nga daghan sa taga Mindanao ang nakapasar.

"These 52 cadets who passed the selection as they took the examination inside our headquarters is a beacon of hope and an inspiration for future young leaders," matud ni Felix.

Dugang usab ni Major Eugenio Julio C. Osias IV, ang tigpamaba sa 4th ID nga ang bag-ong nakapasar alang sa PMA mo-report sa April 1, 2011 ug mahimong miyembro sa PMA Class 2015.

"These individuals who underwent series of rigid mental and physical examination and were carefully selected to become full government scholars leading to a Bachelors of Science Degree." (SVB)