Datu gitabangan nga madala sa ospital

USA ka 89 anyos nga Datu sa tribong Higaonon sa Impasug-ong, Bukidnon ang gitabangan nga madala kagahapon sa ospital dinhi sa Cagayan de Oro tungod sa gibati.

Miabot mga alas 8:00 sa buntag si Balbino "Datu Manlimbagan" Sanugan, molupyo sa Kaanibungan, Kalabugao, Impasug-ong sa Maria Reyna Xavier University Hospital human kini gi-byahe pinaagi sa aerial evacuation sa Tactical Operations Group (TOG)-Northern Mindanao dinhi.

Ang TOG gihangyo sa 4th Infantry "Diamond" Division (4ID) sa Camp Evangelista, Patag tungod sa kalisod pagbiyahe kang Sanugan.

Nasayran nga kapin sa 43 kilometros nga guba nga dalan ang kinahanglan agian sa mga sakop sa kasundalohan sa 403rd Infantry Brigade una pa modangat sa highway sa lungsod, matud ni 2Lt. Chrystin Joan B. Pamplona sa 4ID.

Matud ni Dr. Antonio J. Montalvan, II, ang cultural affairs consultant sa A Brown Company, Inc., giingong wala pay pinal nga diagnosis ang mga doktor sa nasangpit nga ospital ngadto sa gibati ni Sanugan, apan walay angay nga kabalak-an.

Ang A Brown Company, Inc., gipanag-iyahan ni Walter Brown, adunay plantasyon sa palm oil didto sa lugar ni Sanugan. Si Brown ug Sanugan suod nga maghigala, matud ni Montalvan.

"Adtong Sabado (April 9, 2011) nag-decide na gayud si Mr. Brown nga dalhon na si Sanugan sa ospital. Apan wala mi makatuo nga ingon ani kadali ang responde sa 4ID," niya pa.

"Gusto lamang ipaabot ni 4ID commander Gen. Victor A. Felix nga andam ang kasundalohan motabang panahon nga kini gikinahanglan," dugang ni Pamplona.