4 naangol sa aksidente sa dalan

UPAT ka mga tawo ang pulos ninglanding sa balay tambalanan human naaksidente sa dalan niadtong Sabado sa managlahing dapit.

Unang nilanding sa Northern Mindanao Medical Center (NMMC) sila si Ritchie Depedro, 23, minyo, ug Nilo Abao, 31, minyo, pulos residente sa Inubolan, lungsod sa Salay, Misamis Oriental.

Nasayran nga gikan ang mga biktima sa sentro nga bahin kay nagpalit og pan dihang pauli na naligsan ni Depedro ang iro hinungdan sa ilang pagkaligid ug pagkabunal sa ilang mga ulo sa semento.

Pangos ug bun-og sa lawas ang naangkon sa duha nga gidala sa Balingasag Hospital, apan giduso sa NMMC ning siyudad sa Cagayan de Oro tungod sa grabeng naangkon nga kadaut.

Sa kasamtangan, giobserbahan sa mga doktor ang kahimtang sa mga biktima.

Samtang laing duha ka biktima ang pulos nabunal ang ulo nga mao sila si Emiliano Buro, 31, minyo ug Rumulo Diaz, 52, minyo, redidente sa Macanhan ning siyudad.

Nahitabo ang insidente samtang anaa sa Lapasan, Agora ning siyudad ang mga biktima sakay og motorsiklo niadtong tungora.

Kalit lang nga mibabag sa dalan ang usa ka van hinungdan sa pagbarag sa motorsiklo ug pagkaligid niini miresulta pagkabunal sa ulo sa duha ka mga biktima.

Gipangdala ang mga biktima sa nagpakabanang katawhan nga nakakita sa hitabo samtang mibiya lamang ang van nga mibabag kanila.

Giimbestigahan pa sa Roads and Traffic Administration (RTA) ang hitabo. (Stephanie V. Berganio)