Inahan nabanggaan, patay

Monday, July 11, 2011

PATAY ang usa ka inahan human nabanggaan og sakyanan niadtong Domingo mga alas 11:30 sa buntag sa Zone-2, Sinaloc, lungsod sa El Salvador, Misamis Oriental.

Giila ang biktima nga mao si Natividad C. Magdale, 74, balo, residente sa susamang dapit.

Have something to report? Tell us in text, photos or videos.

Si PS/Ins. Lito Baculio, hepe sa El Salvador Police Station nga nahinabi sa Sun.Star Superbalita, niingon nga milakaw-lakaw ang biktima bisan paman sa pagpugong sa mga anak niini ug dihang mitabok kini sa kalsada kalit lang kining nabanggaan sa pribadong sakyanan nga Hyundai gimaneho ni Henry G. Sedoriba, 56, minyo, lumad nga taga Pala-o, siyudad sa Iligan.

Dihang anaa na sa tunga sa kalsada ang biktima, kalit lang kining mibalik sa iyang agi hinungdan nga maayong pagkasapon niini.

Naigo ang kilid nga bahin niini sa side mirror ug nilagpot ang biktima sa kalsada, naapektuhan usab ang ulo niini dihang nabunal sa semento.

Wala usab kini gipasagdan sa driver ug daling gisakay sa iyang sakyanan. Gidala sa JR. Borja Memorial Hospital ning siyudad sa Cagayan de Oro apan dead on arrival nga gideklarar sa doktor.

Matud ni Baculio nga nasabutan sa mga anak niini nga sabot-sabotan na lamang ug dili na pasakaan sa kaso ang driver labina nga wala man sab niini gipasagdan ang mga balayrunon ug mga pinansyal nga panginahanglan sa biktima.

Hinuon, sa pagsulat ning balita ang driver detinado karon sa prisuhan sa el Salvador Police Station. (SVB)