P50M danyos sa gisunog sa NPA

Tuesday, July 19, 2011

GIKONDENA sa 4th Infantry Division, Philippine Army ang pagpangilkil ug pagpanunog sa mga ekipo sa mga sakop sa New People’s Army (NPA) nga nahitabo niadtong Dominggo sa hapon sa Sitio Dal-as, Barangay Plaridel, lungsod sa Claveria, Misamis Oriental.

Si Lieutenant Colonel Jose Maria Cuerpo II, Commanding Officer sa 8th Infantry Battalion, niingon nga mokabat sa 20 ka mga armado ang nanunog sa mga ekipo nga gipanag-iyahan sa Santa Clara Corporation ug contractor sa Minergy Company, gipanag-iyahan sa Singaporean national.

Have something to report? Tell us in text, photos or videos.

Apil sa mga nasunog ang usa ka unit nga RI0 Dump truck, duha ka Caterpillar, backhoe, ug usa ka unit crane nga gibana-bana sa kompanya nga mobalor tanan og 50 milyon nga sa kasamtangan dili na gyod mapuslan.

Daw giapil pagdala ang duha ka pistola sa mga security guard sa kompanya.

Human sa insidente misibat ang mga armado agi sa Cabulig River nga hapit na masakop sa lungsod sa Balingasag.

Gani ang mga residente sa maong dapit mibiya kasamtangan sa ilang mga puloy-anan tungod sa kahadlok nga magbinayloay sa bala ang mga sakop sa NPA ug mga sundalo nga nihimo na og operasyon kalabot sa hitabo.

Nasayran usab nga daw taod-taod na nga nihimo sa pagpangilkil ang maong grupo ngadto sa kompanya, apan nidumili sa paghatag hinungdan nga gibaharan ug gihimo ang ingon.

Mitumaw usab ang taho nga daw gipanunog sa maong grupo ang mga ekipo tungod kay daghan daw sa mga gustong motrabaho niini ang gipangayoan lamang og mga requirements apan dihang nakagasto na og dako wala gidawat sa kompanya nga giingong naghatag kahasol ngadto sa aplikante.

Si Major Eugenio Julio C Osias IV, tigpamaba sa 4ID miingon nga ang pagpangilkil usa sa motibo sa pagpanunog.

“These acts of terrorism, making the lives of the people more miserable, particularly in the far-flung community, burning of the heavy equipment, is a big blow to the socio-economic development aspirations of the people of the municipality and will discourage foreign investors to come over,” dugang ni Osias, kinsa hugot nikondena sa hitabo. (Stephanie V. Berganio)